Pas më shumë se 25 vitesh, drejtësia shqiptare ka arritur të gjurmojë dhe arrestojë në Itali dy vëllezërit Artur dhe Arben Mëhilli, të përfshirë në një ngjarje që ndodhi në fund të viteve ’90 në Lushnjë.
Ngjarja daton në vitin 1999, kur ata ishin të përfshirë në një rast që çoi në humbjen e jetës së të riut Rezar Metaj, pas një ngjarjeje që kishte ndodhur dy vite më parë me vëllain e tyre, Sokol Mëhilli. Ai kishte ndërruar jetë në vitin 1997 dhe autorët nuk u identifikuan menjëherë.
Në vitin 2001, Gjykata e Lushnjës i dënoi të dy në mungesë me 32 vite burg në total, për shkak të përfshirjes së tyre dhe mbajtjes së armëve pa leje. Pas ngjarjes, ata u larguan drejt Italisë, ku jetuan për vite me radhë me identitete të tjera, Artur Davidhi dhe Arben Gjermeni, dhe sigurojnë dokumente qëndrimi.
Zbulimi i tyre erdhi pas një sinjalizimi nga Italia, ku u raportua për persona me identitet të dyshimtë që jetonin me familjarë të lidhur me ta. Pa gjurmë të gishtërinjve në Shqipëri, hetuesit përdorën teknologjinë e njohjes së fytyrës për të identifikuar vëllezërit.
Duke krahasuar fotografitë e vjetra me imazhet e fundit nga Italia, ekspertët konfirmuan identitetin e tyre, pavarësisht ndryshimeve gjatë viteve.
Artur Mëhilli, atëherë 33 vjeç, u arrestua në Itali në moshën 60-vjeçare. Arben Mëhilli, atëherë 27 vjeç, sot është 54 vjeç. Të dy janë në pranga dhe pritet të kthehen në Shqipëri për të përfunduar procedurat ligjore.
Ngjarja mori vëmendje të veçantë për shkak të lidhjes familjare me Stenaldo Mëhillin, i njohur së fundmi për pjesëmarrjen në “Big Brother VIP”, i cili ka rrëfyer më parë se babai i tij, Sokol Mëhilli, vdiq kur ai ishte vetëm 1-muajsh.
