Mjeku Julian Habibaj, 53 vjeç, është ndaluar nga punonjësit e Komisariatit të Policisë Nr. 3 në Tiranë, i dyshuar për veprën penale “Goditje për shkak të detyrës”.
Ai ushtronte aktivitetin e tij profesional në maternitetin “Mbretëresha Geraldinë” dhe është denoncuar nga kryeinfermierja e spitalit. Sipas saj, përplasja ka nisur pasi ajo i ka kërkuar mjekut të plotësonte një protokoll mjekësor për një paciente, kërkesë që është kundërshtuar prej tij shoqëruar me ofendime. Konflikti ka agravuar, duke çuar në një akt dhune, ku mjeku dyshohet se e ka kapur për fyti kryeinfermieren, duke i shkaktuar shenja të dukshme fizike.
Nga burime zyrtare bëhet me dije se ndaj Habibajt ishin regjistruar më parë 11 masa disiplinore për sjellje të papërshtatshme në ambientet e punës, ndërsa kjo shënon rastin e parë kur ai përballet me kallëzim penal për dhunë. Policia po vijon hetimet për zbardhjen e plotë të rrethanave dhe për marrjen e masave të nevojshme ligjore./shqiperiapost
