Një kapitull i mbetur pezull për vite mes këngëtares Dafina Zeqiri dhe moderatorit Labinot Gashi është mbyllur gjatë festave të fundvitit, duke sjellë një pajtim të papritur mes tyre.
Rikthimi i komunikimit ndodhi gjatë festës së 25-vjetorit të karrierës së Labinot Gashit, ku Dafina ishte e ftuara e veçantë. Prania e saj në këtë mbrëmje u pa si një sinjal publik se marrëdhënia mes tyre kishte hyrë në një kapitull të ri, pas një periudhe të gjatë pa kontakt.
Gjatë fjalimit të tij, Labinoti foli hapur për rëndësinë që Dafina ka pasur në jetën dhe karrierën e tij profesionale, duke përmendur lidhjen e tyre të hershme dhe duke e cilësuar vitin që lamë pas si të veçantë, sidomos për faktin se këngëtarja është bërë nënë.
Në një moment emocional, ai kërkoi ndjesë publikisht për keqkuptimet dhe lëndimet e së shkuarës, duke shprehur dëshirën për të mbyllur çdo kapitull të vjetër dhe për të nisur një faqe të re në marrëdhënien e tyre.
