Pas pezullimit të Lotarisë Amerikane, Departamenti i Shtetit i SHBA ka njoftuar ndalimin e përkohshëm të dhënies së vizave të emigracionit për Shqipërinë, duke nisur nga 21 janari, pa një afat të përcaktuar për përfundimin e masës.

Vendimi bazohet në një memorandum të brendshëm, të raportuar fillimisht nga Fox News Digital, i cili udhëzon zyrtarët konsullorë që të refuzojnë aplikimet për viza emigracioni, ndërsa po kryhet një rishikim i plotë i procedurave të kontrollit dhe verifikimit.

Sipas dokumentit, pezullimi do të mbetet në fuqi deri në përfundimin e rivlerësimit të procesit të përpunimit të vizave emigratore nga Departamenti i Shtetit.

Rregulla më të ashpra dhe kriteri “public charge”

Që në nëntor 2025, Departamenti i Shtetit kishte udhëzuar përfaqësitë diplomatike në mbarë botën të zbatonin rregulla më të rrepta kontrolli, bazuar në dispozitën e njohur si “public charge” e ligjit të emigracionit amerikan.

Sipas këtij kriteri, vizat do të refuzohen për aplikantët që konsiderohen rrezik për t’u bërë barrë publike për shtetin amerikan. Vlerësimi përfshin një sërë faktorësh, si:

• gjendja shëndetësore
• mosha
• njohuritë e gjuhës angleze
• situata financiare
• nevoja e mundshme për kujdes mjekësor afatgjatë

Aplikantët më të moshuar, mbipeshë, ata që kanë përfituar më parë ndihma shtetërore ose kanë qenë të institucionalizuar, mund të përballen me refuzim.

Zëdhënësi i Departamentit të Shtetit, Tommy Piggott, deklaroi se SHBA do të përdorë autoritetin ligjor për të ndaluar emigrantët potencialë që mund të përfitojnë nga fondet publike amerikane.

Shqipëria mes 75 vendeve të prekura

Sipas Fox News, Shqipëria renditet mes rreth 75 vendeve, qytetarëve të të cilave do t’u pezullohet shqyrtimi i vizave të emigracionit nga data 21 janar. Në këtë listë përfshihet edhe Kosova, si dhe vende të tjera nga Evropa, Azia, Afrika dhe Amerika Latine.

The post Goditje për Shqiptarët: SHBA pezullon vizat për Shqipërinë dhe Kosovën appeared first on Shqiperia Post.