Sot shënohen 558 vjet nga vdekja e Heroit tonë Kombëtar, Gjergj Kastrioti Skënderbeu (1405 – 17 janar 1468).
Gjergj Kastrioti Skënderbeu përfaqëson jo vetëm figurën më të rëndësishme të historisë shqiptare, por edhe një epokë të tërë të qëndresës dhe identitetit kombëtar.
I lindur në vitin 1403, Gjergj Kastrioti ishte pjesë e familjes fisnike të Kastriotëve. I ati, Gjon Kastrioti, ishte një nga udhëheqësit më të rëndësishëm të kohës, që sundonte qytete si Kruja dhe Mirdita, ndërsa e ëma ishte Vojsava. Në moshë të re, Skënderbeu u dërgua peng në oborrin osman, fillimisht në vitin 1415 dhe më pas në 1423, ku mori një formim të gjerë ushtarak dhe diplomatik.
Kjo periudhë shërbeu si bazë për aftësitë e tij strategjike, të cilat do t’i vinte më pas në shërbim të atdheut. Pas kthimit në Shqipëri, ai u shfaq si udhëheqësi kryesor i shqiptarëve, duke krijuar një aleancë të fuqishme që i bëri ballë avancimit osman në Ballkan.
Skënderbeu mbetet një emër i paharrueshëm i historisë kombëtare, simbol i guximit, qëndresës dhe luftës për liri e dinjitet. Ai hyri në histori si një nga gjeneralët më të mëdhenj të kohës, një strateg i shquar i luftërave mbrojtëse, i cili me një ushtri të vogël arriti të përballonte dhe të mposhtte forcat osmane, ndër më të organizuarat dhe modernet e asaj periudhe.
Lufta e shqiptarëve nën udhëheqjen e tij shënoi një kthesë vendimtare në organizimin politik të vendit dhe forcoi ndjeshëm bashkimin kombëtar.
