Prezantuesi i emisionit italian La Vita in Diretta, Alberto Matano, 53 vjeç, së bashku me gazetaren e terrenit Barbara Di Palma, 46 vjeç, janë vënë nën padi për shpifje të rënduar nga kujdestarja shqiptare A.S.
Gruaja 45-vjeçare kishte qenë më herët nën hetim dhe në nëntor të vitit të kaluar u dënua me dy vjet burg për shfrytëzim të paaftësisë mendore. Sipas akuzës, ajo dyshohet se ka ndikuar te baronesha Maria Malfatti – e cila u nda nga jeta më 31 tetor 2023 në moshën 87-vjeçare – për ta shpallur trashëgimtare universale dhe për t’i lënë pasuritë e saj, me një vlerë të përllogaritur rreth pesë milionë euro. Në proces janë paraqitur si palë civile nëntë nipërit e baroneshës, të cilët kërkojnë të mbrojnë interesat e trashëgimisë.
Rasti i kujdestares u trajtua në emisionin televiziv më 16 prill, në një kohë kur seanca paraprake gjyqësore ishte ende në zhvillim. A.S. ka kundërshtuar veçanërisht përdorimin e termit “djallëzore” gjatë reportazhit, si dhe insinuatat se ajo mund të kishte lidhje me një rrjet mashtrues.
Më 25 qershor, Prokuroria e Roveretos paraqiti kërkesë për arkivimin e padisë, duke theksuar mungesën e provave të mjaftueshme për veprën penale të shpifjes. Megjithatë, kujdestarja, përmes avokatit të saj Nicola Canestrini, ka kundërshtuar vendimin dhe dosja aktualisht ndodhet në shqyrtim pranë gjyqtarit të seancës paraprake, i cili pritet të caktojë një datë për shqyrtimin e çështjes.
Nga ana e tij, avokati i gazetarëve, Luca Tirapelle, ka deklaruar se reportazhi ka pasur karakter informues dhe nuk ka pasur qëllim denigrues, duke përfshirë edhe dëshmi nga mike të baroneshës që e përshkruanin sjelljen e kujdestares si “të përzemërt”. Ndërkohë, mbrojtja e A.S. këmbëngul se termi i përdorur është fyes dhe synon personalitetin e klientes së tij, jo faktet e trajtuara në raportim.
Çështja mbetet ende e hapur, ndërsa pritet që gjyqtari të vendosë nëse hetimet do të vijojnë apo nëse do të ngrihen akuza ndaj gazetarëve.
