A e dini se trupi i njeriut ka një “tru të dytë” që ndodhet në stomak? Ky sistem quhet sistemi nervor enterik dhe përbëhet nga mbi 100 milionë qeliza nervore që shtrihen përgjatë gjithë aparatit tretës, nga ezofagu deri në rektum. Ky rrjet kompleks është në komunikim të vazhdueshëm me trurin, duke luajtur një rol të rëndësishëm në mënyrën se si ndiejmë, mendojmë dhe reagojmë ndaj ushqimit.
Neuroshkencëtari Diego Bohórquez shpjegon se lidhja mes stomakut dhe trurit është shumë më e thellë nga sa mendohej më parë. Kjo marrëdhënie ndikon jo vetëm në preferencat ushqimore, por mund të hapë rrugë të reja për trajtimin e sëmundjeve të ndryshme si obeziteti, çrregullimet e të ngrënit, sindroma e zorrës së irrituar, autizmi apo çrregullimi i stresit post-traumatik (PTSD).
Për një kohë të gjatë, shkencëtarët besonin se komunikimi mes këtyre dy sistemeve ndodhte vetëm përmes hormoneve të prodhuara nga qelizat enteroendokrine. Megjithatë, studimet e fundit të Bohórquez, neuroshkencëtar në Universitetin Duke dhe anëtar i TED, tregojnë se disa prej këtyre qelizave krijojnë edhe lidhje të drejtpërdrejta fizike me neuronet, duke formuar një rrjet komunikimi shumë më të shpejtë dhe kompleks.
Interesi i tij për këtë fushë u forcua edhe nga përvoja personale e një mikeje që iu nënshtrua një operacioni bypass gastrik. Pas humbjes së konsiderueshme në peshë dhe përmirësimit të shëndetit, ajo vuri re edhe një ndryshim të papritur në shijet ushqimore. Ushqime që më parë nuk i preferonte, pas operacionit filluan t’i dëshironte. Fenomene të tilla janë vërejtur edhe te pacientë të tjerë, por shkencëtarët ende po përpiqen të kuptojnë mekanizmin që qëndron pas tyre.
Sipas Bohórquez, qelizat enteroendokrine jo vetëm që çlirojnë hormone, por kanë edhe zgjatime të veçanta, të ngjashme me neuronet, të quajtura “neuropod”. Këto struktura u mundësojnë qelizave të dërgojnë sinjale direkt te sistemi nervor, duke ndikuar në sjelljen tonë ushqimore.
Kjo njohuri ndihmon gjithashtu në shpjegimin e disa çrregullimeve që më parë konsideroheshin thjesht psikologjike. Për shembull, disa fëmijë me anoreksi mund të jenë jashtëzakonisht të ndjeshëm ndaj ushqimit që konsumojnë, duke përjetuar ankth nga sinjalet që vijnë nga sistemi tretës. Zbulime të tilla po i shtyjnë shkencëtarët të rishikojnë mënyrën se si kuptohen dhe trajtohen këto gjendje në të ardhmen.
