Blerina Basha, nëna e tre fëmijëve të moshave 5, 10 dhe 12 vjeç, ka treguar vështirësitë që përjeton si nënë e divorcuar prej pesë vitesh dhe si po përballet me denoncimin e ish-vjehrrës së saj.
“Nuk i kam braktisur fëmijët. Thjesht isha në punë. Punoj si banakiere në një lokal dhe i lë të tre bashkë kur shkoj në punë. Marr 400 mijë lekë në muaj dhe paguaj 300 mijë lekë qira. Nuk kam të ardhura të mjaftueshme për t’i rritur dhe për t’u siguruar atyre ushqim, ndaj nuk mund të jem gjithmonë pranë tyre,” ka thënë ajo.
Blerina tregon shqetësimin për denoncimin e ish-vjehrrës, të cilin e përshkruan si një “kurth”.
“Si mund t’i braktis fëmijët, kur unë vetë punoj për ta? Ajo ka hyrë në shtëpinë time pa leje dhe ka mësuar fëmijët të flasin keq për mua. Nuk është e pranueshme të vijë pa paralajmërim dhe pastaj të më denoncojë në polici,” shton ajo.
Ajo thotë se do të bëjë gjithçka për t’i mbrojtur fëmijët e saj: “Babai i tyre ka qenë në burg në Itali për pesë vjet dhe ka dhënë vetëm 180 mijë lekë të vjetra për fëmijët. Si mund t’i ushqej fëmijët me kaq pak? Nuk i kam braktisur kurrë, jam nënë. Djali i dytë ka vuajtur nga epilepsia dhe kam kaluar shumë kohë në spitale për trajtim. Tani ai është më mirë, dhe nuk do t’i lë kurrë fëmijët.”
Sa i përket shkollës, ajo shpjegon se nuk i ka dërguar fëmijët përkohësisht për shkak të një sëmundjeje ngjitëse tek njëri prej tyre, por tani gjendja është përmirësuar.
Në një komunikim telefonik, Blerina ka shprehur shqetësimin e saj lidhur me hetimet: “Më morën në pyetje në polici dhe dëgjova se mund të më marrin fëmijët. Por nuk do ta lejoj kurrë që të shkojnë në jetimore.”
