Një motorist i kompanisë së shpërndarjes së ushqimit “Wolt Albania” është vënë në pranga nga Policia e Tiranës, në kuadër të një operacioni të gjerë antidrogë që çoi në goditjen e një rrjeti kriminal të shpërndarjes së lëndëve narkotike në kryeqytet.
Sipas uniformave blu, i arrestuari është Erdison Gjella, i cili dyshohet se fshihte aktivitetin e paligjshëm pas rolit të tij si shpërndarës ushqimi. Autoritetet bëjnë me dije se ai përfitonte nga lëvizja e lirë në qytet dhe fakti që nuk ngjallte dyshime gjatë kontrolleve policore, për të shpërndarë drogë në zona të ndryshme të Tiranës.
Arrestimi u krye në kuadër të operacionit policor të koduar “Labirinti 2”, i finalizuar pas rreth katër javësh hetime intensive nga Seksioni për Hetimin e Narkotikëve, në bashkëpunim me Prokurorinë e Tiranës.
Nga hetimet paraprake rezulton se Gjella përdorte motoçikleta të shpërndarjes së ushqimit për të kryer aktivitetin e paligjshëm, duke kamufluar shpërndarjen e lëndëve narkotike.
Policia njofton se hetimet vijojnë për zbardhjen e plotë të veprimtarisë kriminale, identifikimin e bashkëpunëtorëve të tjerë të mundshëm si dhe për sekuestrimin e pasurive të përfituara nga kjo veprimtari e paligjshme.
