Luiz Ejlli është rikthyer sërish në fokus të drejtësisë, pasi Prokuroria e Apelit ka kundërshtuar vendimin e Gjykatës së Apelit që e shpalli atë të pafajshëm.
Në shkallën e parë, këngëtari dhe aktori shkodran ishte dënuar me 1 vit burg për veprën penale të falsifikimit të dokumenteve. Ky vendim u apelua më pas në shkallën e dytë, ku më 8 maj 2025 u vendos pafajësia e tij.
Aktualisht, çështja në ngarkim të tij ndodhet në Gjykatën e Lartë, ndërsa relator i dosjes është caktuar Sokol Binaj.
Së bashku me Ejllin është dënuar edhe Fatmir Avdurramani, i cili dyshohet se ka përfituar nga veprimi i kryer prej tij, në kohën kur ky i fundit nuk ushtronte detyrën e noterit, por përdori vulën përkatëse. Avdurramani rezulton gjithashtu i dënuar më herët në Itali për prostitucion; në vitin 2021 iu vendos sekuestro mbi pasuritë, ndërsa në vitin 2022 ato u konfiskuan.
