Pas 15 vitesh nga zhdukja misterioze që tronditi opinionin publik shqiptar, çështja e Bleona Matës është rikthyer sërish në vëmendje pas një dëshmie të re, e cila ngre dyshime të forta se vajza mund të jetë ende gjallë.
Bleona Mata u zhduk në moshën vetëm 6-vjeçare nga fshati Zapot i Kukësit, teksa kulloste bagëtinë. Sipas informacionit të ri, ajo dyshohet se aktualisht ndodhet në një shtet të Bashkimit Evropian.
Zbulimi është bërë publik nga avokatja Nexhmije Beqiri në emisionin e saj në Report TV, ku u publikua dëshmia e një shtetasi që pretendon se njeh të vërtetën pas zhdukjes së Bleonës. Sipas tij, rrëmbimi nuk ka qenë i rastësishëm, por është kryer nga një person brenda komunitetit të fshatit Zapot.
Burimi pohon se Bleona Mata është rrëmbyer nga një fshatar dhe më pas është dërguar në fshatin Llakatun të Vlorës, tek vajza e rrëmbyesit, e cila nuk mund të kishte fëmijë. Pas rreth tre muajsh, familja në fjalë dyshohet se është larguar drejt Greqisë, ndërsa vitet e fundit besohet se është vendosur në Gjermani.
Këto informacione nuk janë konfirmuar ende zyrtarisht nga autoritetet, por ato hapin një pistë të re hetimore dhe rikthejnë shpresën për zbardhjen e një prej rasteve më të dhimbshme të zhdukjeve në Shqipëri. Familja e Bleona Matës, e cila prej vitesh kërkon të vërtetën, shpreson që kjo dëshmi të çojë në veprime konkrete nga institucionet ligjzbatuese.
