Programi, i njohur si “Porte-Avions Nouvelle Génération” (PANG), pritet të kushtojë rreth 10.25 miliardë euro dhe sipas autoriteteve franceze, anija e re do të hyjë në shërbim në vitin 2038, kohë kur aeroplanmbajtësja “Charles de Gaulle” pritet të dalë në pension pas më shumë se tre dekadash përdorimi.
Qeveria franceze bën të ditur se puna për komponentët e propulsionit bërthamor ka nisur që vitin e kaluar, ndërsa porosia përfundimtare e projektit duhet të miratohet brenda buxhetit të vitit 2025.
Aeroplanmbajtësja e re pritet të jetë anija luftarake më e madhe e ndërtuar ndonjëherë në Europë dhe konsiderohet një element kyç i parandalimit bërthamor francez, por edhe i përpjekjeve europiane për më shumë autonomi në fushën e mbrojtjes, në një kohë kur lufta në Ukrainë vazhdon dhe SHBA shfaq hezitim për angazhimin afatgjatë në sigurinë e kontinentit.
Macron e bëri njoftimin nga një bazë ushtarake franceze në Abu Dhabi, pranë Ngushticës së Hormuzit, një pikë strategjike për furnizimin global me naftë. Ai theksoi se vendimi për nisjen e këtij programi madhor është marrë këtë javë dhe se projekti do të ketë ndikim pozitiv në industrinë franceze, veçanërisht për ndërmarrjet e vogla dhe të mesme.
Ministrja e Forcave të Armatosura, Catherine Vautrin, konfirmoi se aeroplanmbajtësja e re do të zëvendësojë “Charles de Gaulle”, e cila hyri në shërbim në vitin 2001 pas 15 vitesh planifikimi dhe ndërtimi.
Megjithatë, projekti ka ngjallur debat politik në Francë. Disa ligjvënës nga qendra dhe e majta e moderuar kanë sugjeruar shtyrjen e tij, duke përmendur gjendjen e vështirë të financave publike.
Aktualisht, Franca është i vetmi vend i Bashkimit Europian me armë bërthamore dhe një nga pak shtetet europiane që zotëron aeroplanmbajtëse, së bashku me Britaninë e Madhe, Italinë dhe Spanjën. Megjithatë, kapacitetet europiane mbeten shumë më të kufizuara krahasuar me SHBA-në, e cila ka 11 aeroplanmbajtëse, dhe Kinën, që disponon tre të tilla.
Shefi i Shtabit të Forcave të Armatosura franceze, Fabien Mandon, ka bërë të ditur se aeroplanmbajtësja e re do të pajiset me sisteme elektromagnetike për nisjen e avionëve, të cilat Franca do t’i blejë nga Shtetet e Bashkuara, pasi prodhimi vendas nuk është i përputhshëm me afatet dhe kostot e projektit.
