Flori Official është bërë pjesë e shtëpisë së Big Brother VIP Albania, ku u prezantua nga produksioni si një personazh i njohur i rrjeteve sociale. Hyrja e Flori Big Brother ka ngjallur interes të madh tek publiku, por një detaj i rëndësishëm nuk u përmend në asnjë moment gjatë prezantimit të tij.
Produksioni zgjodhi ta prezantojë banorin vetëm me nofkën “Flori Official”, emër me të cilin Flori Big Brother njihet në platformat online, pa dhënë asnjë informacion mbi emrin dhe mbiemrin e tij të vërtetë apo mbi të kaluarën personale.
Sipas raportimeve mediatike, emri i vërtetë i Flori Official është Florian Prini. Ky emër lidhet me artikuj të publikuar nga media italiane, të cilat që në shkurt të vitit 2015 kanë raportuar për një hetim të gjerë lidhur me një rrjet prostitucioni të goditur nga autoritetet në Itali. Në këto raportime, Florian Prini përmendet si një nga personat e përfshirë në këtë çështje penale.
Hetimet, sipas mediave italiane, kishin nisur më 16 qershor 2014, pas një konflikti të dhunshëm mes prostitutave në zonën e Riminit, ku një grua e re mbeti e plagosur me thikë. Gjatë muajve pasues, autoritetet italiane rindërtuan mënyrën e funksionimit të rrjetit, duke evidentuar përplasjet mes prostitutave që vepronin të pavarura dhe atyre që, sipas hetimeve, kontrolloheshin nga një çift me origjinë shqiptare.
Në kronikat e kohës thuhet se Karabinierët arrestuan Florian Prinin dhe partneren e tij, Fabiana Hoxhën. Florian Prini, që sipas këtyre raportimeve identifikohet sot si Flori Official i Big Brother, rezultonte rezident i rregullt në Itali, ndërsa partnerja e tij ishte e regjistruar si emigrante. Banesa e tyre në Torre Pedrera ishte vënë nën vëzhgim dhe konsiderohej si një pikë kyçe për aktivitetet e paligjshme që po hetoheshin.
Aktualisht, mbetet e paqartë nëse produksioni i Big Brother VIP Albania ka vendosur të mos bëjë publik identitetin e plotë të Flori Official për shkak të këtyre raportimeve të së shkuarës, apo nëse vetë Flori Big Brother ka preferuar që historia e tij personale të mos bëhet pjesë e narrativës së programit.
