Deputeti i Partisë Socialiste, Erion Braçe, ka reaguar ashpër në rrjetet sociale lidhur me çmimet e produkteve në tregun shqiptar, duke marrë si shembull konkret rrjetin “Rossmann & Lala” në Shqipëri.
Braçe shprehet se një sërë produktesh të këtij rrjeti shiten në Shqipëri me çmime deri dy herë më të larta krahasuar me të njëjtat produkte në vendet e Bashkimit Europian, duke rrëzuar pretendimet se kjo diferencë vjen si pasojë e taksave apo tatimeve.
Sipas deputetit socialist, arsyeja kryesore e çmimeve të larta nuk lidhet me barrën fiskale, por me abuzimin me çmimet dhe marzhet e larta të fitimit.
“Nuk është tatimi, as taksa. Është abuzimi dhe fitimi i lartë prej abuzimit”, shkruan Braçe në reagimin e tij.
Për të mbështetur argumentet, Braçe sjell krahasime konkrete mes Shqipërisë dhe vendeve të BE-së. TVSH-ja në Gjermani është 19%, në Itali 22%, ndërsa në Shqipëri 20%. Tatimi mbi fitimin në Gjermani varion nga 29% deri në 33%, në Itali është 24%, ndërsa në Shqipëri vetëm 15%.
Edhe në aspektin e pagave, diferencat janë të ndjeshme. Në Gjermani paga minimale arrin rreth 2.050 euro bruto në muaj, në Itali pagat bazë sipas kontratave kolektive nisin nga 1.500 euro bruto e lart, ndërsa në Shqipëri paga minimale është rreth 500 euro bruto në muaj.
Sipas Braçes, këto të dhëna tregojnë qartë se taksat nuk mund të justifikojnë çmime kaq të larta në Shqipëri, veçanërisht kur krahasohen me vendet e BE-së. Ai shton se edhe rënia e fortë e euros duhej ta kishte bërë importin më të lirë për konsumatorët shqiptarë, e jo më të shtrenjtë.
Deputeti thekson se rasti i “Rossmann & Lala” është ilustrues për mënyrën se si funksionon tregu në Shqipëri dhe për nevojën e ndërhyrjes ndaj praktikave abuzive që, sipas tij, dëmtojnë drejtpërdrejt qytetarët dhe fuqinë e tyre blerëse.
