Gjatë kësaj periudhe është konstatuar një rritje graduale dhe pothuajse e njëkohshme e çmimeve, ndërkohë që nuk rezulton që ndërmarrjet në fjalë të kenë zbatuar një metodologji të qartë të përllogaritjes së kostove, e cila do të justifikonte ndryshimet e çmimeve të aplikuara në treg.
Nga analiza e ecurisë së çmimeve rezulton se sa herë njëri prej operatorëve ka rritur çmimet e paketave celulare, operatori tjetër ka ndjekur të njëjtin veprim brenda një kohe të shkurtër, me rritje të ngjashme si në nivel çmimi, ashtu edhe në përmbajtjen e paketës, përfshirë minutat, internetin, SMS-të dhe vlefshmërinë.
Kjo sjellje tregon një reagim të menjëhershëm dhe simetrik, i cili mund të interpretohet si praktikë e bashkërenduar, në kuptim të ligjit “Për mbrojtjen e konkurrencës”.
Po ashtu, analiza e ofertave tregon se paketat e ofruara nga operatorët janë pothuajse identike, si në çmim ashtu edhe në përmbajtje, duke kufizuar ndjeshëm alternativat për konsumatorët dhe duke ulur presionin konkurrues në treg.
Ky homogjenitet i produkteve, i kombinuar me mungesën e transparencës mbi kostot, përbën një rrezik real për koordinim të sjelljes tregtare, me synim ruajtjen e niveleve të qëndrueshme të çmimeve dhe fitimeve.
Autoriteti i Konkurrencës thekson se asnjë nga operatorët nuk ka dorëzuar dokumentacion që të vërtetojë se çmimet janë përcaktuar mbi bazën e analizës së kostove reale të shërbimeve.
Në mungesë të një metodologjie të qartë kosto–çmim, rritjet e çmimeve mund të konsiderohen të pajustifikuara ekonomikisht dhe si rezultat i një sjelljeje të orientuar drejt ndjekjes së një modeli të përbashkët tregtar, më tepër sesa drejt konkurrencës përmes inovacionit apo eficiencës.
Në përfundim, Autoriteti i Konkurrencës vlerëson se, duke qenë se tregu paraqitet me strukturë duopolistike, vihet re sinkronizim në rritjen e çmimeve, oferta pothuajse identike dhe mungesë transparence në raportin kosto–çmim, sjellja e Vodafone Albania dhe One Albania mund të përbëjë shkelje të ligjit “Për mbrojtjen e konkurrencës”.
Hetimi i thelluar do të përfshijë periudhën nga 1 janar 2022 deri më 18 nëntor 2025.
/Burimi: Monitor
