Luiz Ejllit vazhdon të mbetet mes më të komentuarve në showbizin shqiptar, teksa fansat dhe mediat po aludojnë për një rikthim të mundshëm të tij në ekran. Gjatë një interviste të dhënë për mediat në Kosovë, këngëtari u pyet nëse do të jetë pjesë e edicionit të ri të “Ferma VIP”, ku sipas zërave, moderimi pritet t’i besohet Arbanës Osmanit.
Pa dhënë një përgjigje të qartë, fituesi i “Big Brother VIP Albania” zgjodhi të mbajë gjallë misterin. Ai la të kuptohet se ka pasur oferta dhe se është në prag të një projekti të ri televiziv, por pa konfirmuar nëse bëhet fjalë për rolin e kryeplakut.
“Thonë se ku ka zë, ka edhe diçka. Oferta ka pasur, por unë kam qejf që përgjigjen ta jap me një veprim. Duroni edhe pak ditë,” u shpreh Luizi, duke shtuar se shumë shpejt gjithçka do të zbulohet.
Ai theksoi se preferon të flasë përmes veprave dhe jo deklaratave, duke nxitur edhe më shumë kureshtjen e publikut. “Me një lëvizje që do bëj, të gjithë do ta marrin përgjigjen. Duroni diku 10 ditë,” shtoi ai.
Luizi e sheh përfoljen si pjesë të natyrshme të lojës mediatike. Me humor, ai u shpreh se vëmendja është gjithmonë pozitive, duke lënë të hapur çdo skenar për të ardhmen e tij televizive.
Deklaratat e tij kanë mjaftuar që rrjetet sociale të shpërthejnë në komente dhe spekulime, ndërsa mbetet për t’u parë nëse Luizi do të shfaqet në “Ferma VIP” apo do të vijë me një tjetër surprizë për publikun.
