Arian Ndoni mbeti i befasuar këtë të shtunë kur gjeti në kutinë e tij postare një ftesë për dasmë.
Derisa zakonisht ai mban korrespondencë me miq të huaj që ka njohur gjatë qëndrimit të tyre në Shqipëri, ajo që e bën këtë rast të pazakontë është se dasma kishte ndodhur qysh në qershor të vitit 2011.
“U habita kur pashë ftesën. Një ftesë nga SHBA, por kur lexova datën, s’më besohej. Martesa ka ndodhur në vitin 2011, ndërsa tani jemi në 2025. Vetëm sot e gjeta në kutinë time të postës. 14 vite vonesë! Edhe nëse e kishin futur në shishe dhe e hedhin në det si dikur, ndoshta do të kishte ardhur më shpejt,” rrëfen Arian Ndoni me humor.
Ai tregon se ftesa mban në pjesën e pasme vulën e tranzitit, ku duket se ka mbërritur në Shqipëri në janar 2011. Pra, ftesa kishte mbërritur në kohë, por diçka ka ndodhur me shërbimin postar nga Tirana në Durrës dhe ajo ka qëndruar e bllokuar për plot 14 vite, përpara se të arrinte në kutinë e tij postare.
Në epokën e teknologjisë dhe komunikimit të menjëhershëm, duket se ftesat dhe kartolinat mund të udhëtojnë ende me ritme “romantike”, por krejt jashtë kohe.
“Ata janë martuar, ndoshta kanë bërë fëmijë, ndoshta jo… nuk e di, por nuk është korrekt. Unë sapo mora ftesën dhe kjo situatë ka cenuar edhe raportet e miqësisë për ne që ende e vlerësojmë këtë mënyrë komunikimi,” përfundon Ndoni.
