Lim Hoti demaskohet publikisht nga ish-gruaja Albëresha: Akuza të forta për mungesë totale mbështetjeje ndaj djalit
Lim Hoti, i cili aktualisht ndodhet brenda shtëpisë së Big Brother, është vënë në qendër të kritikave publike nga ish-gruaja e tij, këngëtarja Albëresha, me të cilën ka edhe një djalë.
Reagimi i Albëreshës ka ardhur pas disa postimeve të Lim Hotit në rrjete sociale, të cilat ajo i cilëson si të shtirura, ku reperi shfaqej me të birin duke deklaruar se i mungon.
Përmes një postimi të gjatë dhe emocional, Albëresha ka rrëfyer historinë e jetës së djalit të saj, duke theksuar se Lim Hoti nuk ka qenë kurrë i pranishëm dhe nuk ka ofruar asnjë formë mbështetjeje, as emocionale dhe as financiare.
“Është hera e parë që shprehem publikisht në këtë mënyrë, por çdo gjë e ka një limit. Djali im nuk ka pasur asnjë mbështetje nga i ati, as financiarisht. Është e lehtë të postosh një foto për sytë e botës dhe të shkruash se të mungon, por ti nuk ishe pranë tij kur tha fjalën e parë, kur ishte i sëmurë, apo kur kishte nevojë për bukë”, shkruan Albëresha.
Ajo shton se ndërsa Lim Hoti, sipas saj, shpenzonte para për jetën personale dhe argëtim, djali i tyre u la pa asnjë përkujdesje, pas vendimit të reperit për t’i braktisur.
Megjithatë, Albëresha thekson se djali i saj rritet i rrethuar nga dashuria e familjes së saj dhe se nuk do t’i mungojë asgjë:
“Djali im është inteligjent, i zgjuar dhe i mbushur me dashuri nga familja ime. Ai kurrë nuk do të ndiejë mungesë.”
