Nemesio Oseguera Cervantes, i njohur si “El Mencho”, udhëheqësi famëkeq i Kartelit të Gjeneratës së Re të Jaliscos (CJNG), është vrarë gjatë një operacioni të forcave speciale, pasi shërbimet e inteligjencës arritën të lokalizonin njërën nga partneret e tij, e cila i çoi drejt strehës sekrete të tij.
Sekretari i Mbrojtjes i Meksikës, Ricardo Trevilla, bëri të ditur të hënën se agjentët kishin identifikuar fillimisht një person të lidhur ngushtë me të dashurën e “El Mencho-s”, përpara se të ndërmerrej aksioni i koordinuar i së dielës. Hetimet zbuluan se gruaja ishte transportuar drejt Tapalpës, një zonë turistike malore në shtetin Jalisco, ku besohet se fshihej kreu i kartelit së bashku me njerëzit e tij.
Megjithëse partnerja e tij u largua më vonë nga vendndodhja, El Mencho dhe rojet e tij mbetën të bllokuar brenda kompleksit. Forcat e Armatosura meksikane ndërhynë me një operacion special, duke i dhënë fund arratisë së një prej figurave kriminale më të kërkuara në nivel global.
