Alarm për sigurinë ushqimore: Qumësht pluhur me baktere i dhënë foshnjave në Shqipëri dhe Kosovë
Një alarm serioz është ngritur për sigurinë ushqimore në Shqipëri dhe Kosovë, pasi foshnja të moshës 0–2 vjeç rezulton se janë ushqyer me qumësht artificial pluhur të kontaminuar me bakterin Bacillus Cereus, i cili konsiderohet i rrezikshëm për shëndetin e bebeve, pasi shkakton probleme gastrointestinale si diarre dhe të vjella.
Burime për Top Channel bëjnë me dije se vetëm në Shqipëri janë shitur gjithsej 580 kuti nga ky qumësht i rrezikshëm. Ky rast nxjerr në pah problematika serioze të sigurisë ushqimore, jo vetëm për produktet vendase, por edhe për ato të importuara.
Sipas të dhënave, bakteri Bacillus Cereus është identifikuar në 9 lloje qumështi pluhur të markës Nestlé, me datë skadence në vitin 2027. Sasia totale e importuar ishte 1878 kuti, nga të cilat 744 kuti rezulton se janë konsumuar nga foshnja në Shqipëri dhe Kosovë, ndërsa pjesa tjetër është bllokuar dhe grumbulluar nga subjekti tregtar.
Produktet e kontaminuara janë prodhuar nga kompania Nestlé dhe në Shqipëri janë tregtuar nga operatori Rossmann & Lala, i shtrirë në disa qytete të vendit. Alerti për rrezikun është dhënë nga vetë kompania Nestlé, e cila ka kërkuar tërheqjen e menjëhershme të produkteve nga raftet e dyqaneve Rossmann & Lala.
Gjatë një vëzhgimi të kryer nga Top Channel në disa filiale në Tiranë, në disa prej tyre ishte vendosur një njoftim ku thuhej se Nestlé po tërhiqte si masë paraprake disa seri të qumështit formulë BEBA, konkretisht: BEBA Expert HA, BEBA Expert Comfort+ dhe BEBA Supreme, për shkak të dyshimit për praninë e mikroorganizmit Bacillus Cereus.
Megjithatë, ky njoftim nuk ishte i pranishëm në të gjitha pikat e shitjes. Në filialin e zonës së 9-katëshve, produkti ishte hequr nga raftet, por mungonte informacioni për prindërit, të cilët nuk ishin paralajmëruar të ndërprisnin përdorimin e qumështit të kontaminuar.
Një tjetër shkelje e konstatuar nga Autoriteti Kombëtar i Ushqimit (AKU) lidhet me mungesën e dokumentacionit të gjurmueshmërisë së produktit. Për këtë arsye, ndaj subjektit Rossmann & Lala është vendosur një masë administrative me gjobë në vlerën 200 mijë lekë të reja.
Ndërkohë, prindërve u është kërkuar që ta kthejnë menjëherë produktin, i cili paraqet rrezik për shëndetin e foshnjave të porsalindura.
Burimi: Top Channel
