Një operacion i pazakontë, i shoqëruar me masa ekstreme sigurie, është zhvilluar në orët e para të mëngjesit të 15 janarit 2026. Në kuadër të tij, 15 të burgosur me rrezikshmëri tepër të lartë janë transferuar nga Burgu i Durrësit drejt IEVP Peqin, i konsideruar aktualisht institucioni më i sigurt i vuajtjes së dënimit në vend.
Transferimi është kryer pak pas mesnate, nën shoqërimin e dhjetëra mjeteve policore dhe me protokolle të rrepta sigurie. Kolona e mjeteve ka mbërritur në ambientet e burgut të Peqinit rreth orës 00:15. Burime jozyrtare bëjnë me dije se në këtë grup përfshihen disa nga emrat më të njohur dhe më të rrezikshëm të botës së krimit, mes tyre edhe Lul Berisha.
Vendimi për këtë zhvendosje masive është marrë menjëherë pas arratisjes së Altin Ndoci nga Spitali i Durrësit, një ngjarje që tronditi opinionin publik dhe vuri në dukje problematika serioze në sigurinë e sistemit penitenciar.
Në qendër të operacionit kanë qenë të dënuarit me rrezikshmëri të lartë, të cilët deri më tani mbaheshin në Burgun e Durrësit, institucion i njohur ndryshe edhe si “burgu i VIP-ave”, për shkak të profilit të lartë të disa prej personave që vuajnë dënimin aty./shqiperiaPost.com
